basti mili makan mile baam-o-dar mile

bastī milī makān mile bām-o-dar mile

maiñ DhūñDhtā rahā ki kahīñ koī ghar mile

be-samt kā.enāt meñ kyā samt kī talāsh

bas chal paḌe haiñ raah jahāñ aur jidhar mile

āvārgī meñ tum bhī kahāñ tak chaloge saath

pahle bhī rāste meñ ka.ī ham-safar mile

lagtā hai ab ke jaan hī le legī fasl-e-gul

ashkoñ meñ aaj bhī ka.ī laḳht-e-jigar mile

shāyad guzar rahā huuñ kisī karbalā se maiñ

ḳheme jale hue mile nezoñ pe sar mile

maiñ chāhtā huuñ kaaT de koī mirī ye baat

jitne baḌe daraḳht mile be-samar mile

kyā haath paañv maar rahe ho zamīn par

Duubo samundaroñ meñ to shāyad guhar mile

basti mili makan mile baam-o-dar mile

main DhunDhta raha ki kahin koi ghar mile

be-samt kaenat mein kya samt ki talash

bas chal paDe hain rah jahan aur jidhar mile

aawargi mein tum bhi kahan tak chaloge sath

pahle bhi raste mein kai ham-safar mile

lagta hai ab ke jaan hi le legi fasl-e-gul

ashkon mein aaj bhi kai laKHt-e-jigar mile

shayad guzar raha hun kisi karbala se main

KHeme jale hue mile nezon pe sar mile

main chahta hun kaT de koi meri ye baat

jitne baDe daraKHt mile be-samar mile

kya hath panw mar rahe ho zamin par

Dubo samundaron mein to shayad guhar mile