bastiyāñ ho ga.iiñ benām-o-nishāñ rātoñ-rāt
aise tūfān bhī aa.e haiñ yahāñ rātoñ-rāt
jī meñ aatā hai ki ta.abīr tujhī se pūchheñ
ho gayā ḳhvāb tirā jism-e-javāñ rātoñ-rāt
shaam hañgāma thā ḳhushiyāñ thiiñ hasīñ chehre the
kho ga.ī mahfil-e-ahbāb kahāñ rātoñ-rāt
husn jaltā rahā sham.oñ kī tapāñ ḳhalvat meñ
ho ga.ī mash.al-e-mahtāb dhuāñ rātoñ-rāt
ik jahāñgīr ḳhamoshī kī rajaz-ḳhvānī hai
ho gayā kyā ye mire ghar kā samāñ rātoñ-rāt
kaun in kaliyoñ kī qismat pe na ro.e 'ḳhātir'
jin ko kar detī hai taqdīr javāñ rātoñ-rāt
bastiyan ho gain benam-o-nishan raaton-raat
aise tufan bhi aae hain yahan raaton-raat
ji mein aata hai ki tabir tujhi se puchhen
ho gaya KHwab tera jism-e-jawan raaton-raat
sham hangama tha KHushiyan thin hasin chehre the
kho gai mahfil-e-ahbab kahan raaton-raat
husn jalta raha shamon ki tapan KHalwat mein
ho gai mashal-e-mahtab dhuan raaton-raat
ek jahangir KHamoshi ki rajaz-KHwani hai
ho gaya kya ye mere ghar ka saman raaton-raat
kaun in kaliyon ki qismat pe na roe 'KHatir'
jin ko kar deti hai taqdir jawan raaton-raat
Source:
Funoon(Jadeed Ghazal Number: Volume-002) (Pg. 521)
-
- Edition: 1969
- Publisher: Ahmad Nadeem Qasmi
- Year of Publication: 1969
Additional information available
Click on the INTERESTING button to view additional information associated with this sher.
rare Unpublished content
This ghazal contains ashaar not published in the public domain. These are marked by a red line on the left.