bata rahe hain ye tewar tere abhi se mujhe

batā rahe haiñ ye tevar tere abhī se mujhe

ki maar Dālegā ik roz ḳhāmushī se mujhe

tamām 'umr safar jab añdherī shab kā kiyā

to ḳhauf kyoñ ho bhalā aaj tīrgī se mujhe

tirī pasand judā hai mirā mizāj alag

tujhe hai rangoñ se ulfat to sādgī se mujhe

mirī hayāt ko har pal jo naag ban ke Dase

mu'āf karnā ḳhudā aisī zindagī se mujhe

maiñ is safar kā irāda hī tark kar detā

agar guzarnā na paḌtā tirī galī se mujhe

mujhe sazā de agar hai koī ḳhatā merī

magar na dekh kabhī itnī be-ruḳhī se mujhe

muhīb saaya hirāsāñ na kar sakā lekin

Darā diyā hai patangoñ ne raushnī se mujhe

koī gila mire lab par kabhī na aa.egā

pilā de zahr bhī gar aaj tū ḳhushī se mujhe

bata rahe hain ye tewar tere abhi se mujhe

ki mar Dalega ek roz KHamushi se mujhe

tamam 'umr safar jab andheri shab ka kiya

to KHauf kyon ho bhala aaj tirgi se mujhe

teri pasand juda hai mera mizaj alag

tujhe hai rangon se ulfat to sadgi se mujhe

meri hayat ko har pal jo nag ban ke Dase

mu'af karna KHuda aisi zindagi se mujhe

main is safar ka irada hi tark kar deta

agar guzarna na paDta teri gali se mujhe

mujhe saza de agar hai koi KHata meri

magar na dekh kabhi itni be-ruKHi se mujhe

muhib saya hirasan na kar saka lekin

Dara diya hai patangon ne raushni se mujhe

koi gila mere lab par kabhi na aaega

pila de zahr bhi gar aaj tu KHushi se mujhe