bataen kya ki aae hain kahan se hum kahan ho kar

batā.eñ kyā ki aa.e haiñ kahāñ se ham kahāñ ho kar

nishāñ ab DhūñDte-phirte haiñ ghar kā be-nishāñ ho kar

lubhāne ko dil-e-shaidā ke saarī parda-dārī thī

ayaañ ho tum nihāñ ho kar nihāñ ho tum ayaañ ho kar

hamārī ḳhaak ke zarre fanā ho kar bhī chamkeñge

uruuj apnā dikhā.eñ ge ye najm-e-āsmāñ ho kar

dil-e-āvāra kyuuñ tujh ko ḳhayāl kū-e-jānāñ hai

are nādāñ kahāñ jā kar rahegā be-nishāñ ho kar

ye daur-e-mai-kashī har-vaqt mahv-e-dīd rakhtā hai

kahāñ āñkhoñ meñ ye ġhaflat rahe ḳhvāb-e-girāñ ho kar

musalmāñ ho ke tark-e-but-parastī ai ma.āz-allāh

ḳhudā ko ham ne pahchānā hai shaidā-e-butāñ ho kar

ye bār-e-ma.asiyat manzil kaḌī aur shām-e-tanhā.ī

chale haiñ kyā samajh kar ham bhī rusvā-e-jahāñ ho kar

abhī kyā jaane kyā kyā rañg vo ai 'shauq' badlegā

zamīñ par ik karegā hashr barpā āsmāñ ho kar

bataen kya ki aae hain kahan se hum kahan ho kar

nishan ab DhunDte-phirte hain ghar ka be-nishan ho kar

lubhane ko dil-e-shaida ke sari parda-dari thi

ayan ho tum nihan ho kar nihan ho tum ayan ho kar

hamari KHak ke zarre fana ho kar bhi chamkenge

uruj apna dikhaen ge ye najm-e-asman ho kar

dil-e-awara kyun tujh ko KHayal ku-e-jaanan hai

are nadan kahan ja kar rahega be-nishan ho kar

ye daur-e-mai-kashi har-waqt mahw-e-did rakhta hai

kahan aankhon mein ye ghaflat rahe KHwab-e-giran ho kar

musalman ho ke tark-e-but-parasti ai maaz-allah

KHuda ko hum ne pahchana hai shaida-e-butan ho kar

ye bar-e-masiyat manzil kaDi aur sham-e-tanhai

chale hain kya samajh kar hum bhi ruswa-e-jahan ho kar

abhi kya jaane kya kya rang wo ai 'shauq' badlega

zamin par ek karega hashr barpa aasman ho kar