bataun kya shab-e-furqat meri kaise sanwarti hai

batā.ūñ kyā shab-e-furqat merī kaise sañvartī hai

kabhī to huuk uThtī hai kabhī ro ro guzartī hai

udhar to Tiis uThtī hai idhar aañsū ubalte haiñ

usī dam kahkashāñ tāroñ se apnī maañg bhartī hai

junūn-e-jazba-e-ulfat kī betābi ma.āz-allāh

jo kam hotā hai dard-e-dil to phir vahshat ubhartī hai

mirī vāraftagī is jazba-e-dil kī qasam khā kar

mohabbat naam le kar bhī mohabbat hī se Dartī hai

tirā ye jazba-e-ulfat salāmat hī rahe har dam

mohabbat jab kabhī had se guzartī hai akhartī hai

are 'ġham' laġhzish-e-soz-e-jigar kā kaif kyā kahiye

zabāñ majbūr ho jaatī hai jab dil meñ utartī hai

bataun kya shab-e-furqat meri kaise sanwarti hai

kabhi to huk uThti hai kabhi ro ro guzarti hai

udhar to Tis uThti hai idhar aansu ubalte hain

usi dam kahkashan taron se apni mang bharti hai

junun-e-jazba-e-ulfat ki betabi maaz-allah

jo kam hota hai dard-e-dil to phir wahshat ubharti hai

meri waraftagi is jazba-e-dil ki qasam kha kar

mohabbat nam le kar bhi mohabbat hi se Darti hai

tera ye jazba-e-ulfat salamat hi rahe har dam

mohabbat jab kabhi had se guzarti hai akharti hai

are 'gham' laghzish-e-soz-e-jigar ka kaif kya kahiye

zaban majbur ho jati hai jab dil mein utarti hai