bataun main tumhein aankhon mein aansu ya lahu kya hai

batā.ūñ maiñ tumheñ āñkhoñ meñ aañsū yā lahū kyā hai

kabhī ai kaash tum pūchho ki merī aarzū kyā hai

maiñ terī āhaTeñ paatā huuñ kaliyoñ ke chaTakne meñ

gulistāñ meñ ba-juz jalvoñ ke tere rañg-o-bū kyā hai

usī ko dard kahtā hai usī ko dard kā darmāñ

nahīñ ye ishq to ai dil batā phir justujū kyā hai

safā.ī pesh karte ho jo apnī tauba-shikanī kī

batāo phir tumhāre haath meñ jām-o-subū kyā hai

dar-e-ka.aba ho pā-e-nāz ho sar rakh diyā ham ne

kahāñ ye shauq-e-sajda dekhtā hai rū-ba-rū kyā hai

mujhe bhī āḳhirash taslīm to ik roz karnā hai

agar kuchh bhī nahīñ huuñ maiñ to phir ye tū hī tū kyā hai

zamāne meñ to 'ġhāzī' naam hai mash.hūr ik be-shak

magar ḳhud kī nazar meñ pūchhiye ki aabrū kyā hai

bataun main tumhein aankhon mein aansu ya lahu kya hai

kabhi ai kash tum puchho ki meri aarzu kya hai

main teri aahaTen pata hun kaliyon ke chaTakne mein

gulistan mein ba-juz jalwon ke tere rang-o-bu kya hai

usi ko dard kahta hai usi ko dard ka darman

nahin ye ishq to ai dil bata phir justuju kya hai

safai pesh karte ho jo apni tauba-shikani ki

batao phir tumhaare hath mein jam-o-subu kya hai

dar-e-kaba ho pa-e-naz ho sar rakh diya hum ne

kahan ye shauq-e-sajda dekhta hai ru-ba-ru kya hai

mujhe bhi aaKHirash taslim to ek roz karna hai

agar kuchh bhi nahin hun main to phir ye tu hi tu kya hai

zamane mein to 'ghazi' nam hai mashhur ek be-shak

magar KHud ki nazar mein puchhiye ki aabru kya hai