bayan-e-shauq ko mafhum se juda na kare

bayān-e-shauq ko mafhūm se judā na kare

sadā vahī hai jo lafzoñ ko be-sadā na kare

kiran kiran ne sambhal kar ye ham ko dars diyā

misāl-e-ashk koī aañkh se girā na kare

havā ke jhoñkoñ se ḳhushbū ke parde hilte haiñ

harīm-e-lāla-o-gul meñ koī chhupā na kare

hamārī āñkheñ shab-o-roz jaise jaltī haiñ

koī charāġh jale bhī to yuuñ jalā na kare

hameñ charāġh bhī haiñ aur hameñ havā bhī haiñ

hamārī ziist pe ab koī tabsira na kare

baḌhegī aur bhī kuchh fāsloñ kī tanhā.ī

jo tez-gām hai vo raah meñ rukā na kare

tire ḳhayāl tirī yaad meñ jo guzrā hai

kabhī vo lamha kisī jā pe āshiyāna kare

sadā-e-ġham se laraztī hai zindagī 'mutrib'

lachaktī shāḳh se bhī phuul ab girā na kare

bayan-e-shauq ko mafhum se juda na kare

sada wahi hai jo lafzon ko be-sada na kare

kiran kiran ne sambhal kar ye hum ko dars diya

misal-e-ashk koi aankh se gira na kare

hawa ke jhonkon se KHushbu ke parde hilte hain

harim-e-lala-o-gul mein koi chhupa na kare

hamari aankhen shab-o-roz jaise jalti hain

koi charagh jale bhi to yun jala na kare

hamein charagh bhi hain aur hamein hawa bhi hain

hamari zist pe ab koi tabsira na kare

baDhegi aur bhi kuchh faslon ki tanhai

jo tez-gam hai wo rah mein ruka na kare

tere KHayal teri yaad mein jo guzra hai

kabhi wo lamha kisi ja pe aashiyana kare

sada-e-gham se larazti hai zindagi 'mutrib'

lachakti shaKH se bhi phul ab gira na kare