bayan sun na saka jab koi bayan ki tarah

bayān sun na sakā jab koī bayāñ kī tarah

sunāyā hāl-e-dil-e-zār dāstāñ kī tarah

ye rāz-e-'ishq hamesha ko raaz rah jaatā

nigāh kaam na kartī agar zabāñ kī tarah

kahīñ hai bū-e-tamannā gul-e-murād kahīñ

nihāl dil kā hai phailāo gulsitāñ kī tarah

kisī ke ḳhanda-e-be-jā kā ab nahīñ shikva

fuġhāñ bhī dil se nikaltī nahīñ fuġhāñ kī tarah

ḳhayāl meñ haiñ bahāreñ nigāh meñ gulshan

guzar rahī hai qafas meñ bhī āshiyāñ kī tarah

banī hai dushman-e-har-ārzū vahī hasrat

lagā ke siine se rakhtā huuñ us ko jaañ kī tarah

jabīn-e-shauq batā.egī lazzat-e-sajda

na dair hai na haram un ke āstāñ kī tarah

zamāna aaj bhī nā-vāqif-e-haqīqat hai

kabhī bahār-e-chaman huuñ kabhī ḳhizāñ kī tarah

miTā ke hastī-e-dil bhī sukūn-e-dil na milā

zamīñ hai sāya-fagan sar pe āsmāñ kī tarah

kabhī na jhuk ke rahīñ sar-bulandiyāñ merī

zamīñ pe 'umr guzārī hai āsmāñ kī tarah

'munīr' un kī nazar ne badal diyā mujh ko

ki ab hañsī bhī jo aatī hai to fuġhāñ kī tarah

bayan sun na saka jab koi bayan ki tarah

sunaya haal-e-dil-e-zar dastan ki tarah

ye raaz-e-'ishq hamesha ko raaz rah jata

nigah kaam na karti agar zaban ki tarah

kahin hai bu-e-tamanna gul-e-murad kahin

nihaal dil ka hai phailao gulsitan ki tarah

kisi ke KHanda-e-be-ja ka ab nahin shikwa

fughan bhi dil se nikalti nahin fughan ki tarah

KHayal mein hain bahaaren nigah mein gulshan

guzar rahi hai qafas mein bhi aashiyan ki tarah

bani hai dushman-e-har-arzu wahi hasrat

laga ke sine se rakhta hun us ko jaan ki tarah

jabin-e-shauq bataegi lazzat-e-sajda

na dair hai na haram un ke aastan ki tarah

zamana aaj bhi na-waqif-e-haqiqat hai

kabhi bahaar-e-chaman hun kabhi KHizan ki tarah

miTa ke hasti-e-dil bhi sukun-e-dil na mila

zamin hai saya-fagan sar pe aasman ki tarah

kabhi na jhuk ke rahin sar-bulandiyan meri

zamin pe 'umr guzari hai aasman ki tarah

'munir' un ki nazar ne badal diya mujh ko

ki ab hansi bhi jo aati hai to fughan ki tarah