bayaz-e-umr mein jab harf-e-motabar hi nahin

bayāz-e-umr meñ jab harf-e-mo'tabar hī nahīñ

to goyā ham meñ kisī baat kā hunar hī nahīñ

ye dā.eroñ kā safar thā tamām kyā hotā

hazār shukr ki tū merā ham-safar hī nahīñ

sukūn-e-nīm-shabī kī talāsh lā-hāsil

phir aise ghar meñ ki jis ghar ke bām-o-dar hī nahīñ

savāl ye hai ki vo merā ham-nafas kyoñ ho

mire mizāj kī jis ko koī ḳhabar hī nahīñ

ki jaise shīshe ke gumbad meñ jī rahe haiñ ham

yahāñ pe taaza havā kā kahīñ guzar hī nahīñ

'nazīr' bastī ke logoñ ko kyoñ nahīñ ehsās

ye sail-e-āb hai aur sirf merā ghar hī nahīñ

bayaz-e-umr mein jab harf-e-mo'tabar hi nahin

to goya hum mein kisi baat ka hunar hi nahin

ye daeron ka safar tha tamam kya hota

hazar shukr ki tu mera ham-safar hi nahin

sukun-e-nim-shabi ki talash la-hasil

phir aise ghar mein ki jis ghar ke baam-o-dar hi nahin

sawal ye hai ki wo mera ham-nafas kyon ho

mere mizaj ki jis ko koi KHabar hi nahin

ki jaise shishe ke gumbad mein ji rahe hain hum

yahan pe taza hawa ka kahin guzar hi nahin

'nazir' basti ke logon ko kyon nahin ehsas

ye sail-e-ab hai aur sirf mera ghar hi nahin