bazm-e-alam ke raaz-dan hain hum

bazm-e-'ālam ke rāz-dāñ haiñ ham

yā'nī ā.īna-e-jahāñ haiñ ham

bāġh-e-urdu ke bāġhbāñ haiñ ham

lafz-o-mā'nī ke tarjumāñ haiñ ham

ham se qaa.em haiñ husn kī qadreñ

'ishq kī gard-e-kārvāñ haiñ ham

jis se vāqif na ho sakī duniyā

us mohabbat kī dāstāñ haiñ ham

ham zamīñ-bos tum falak-andāz

tum kahāñ par ho aur kahāñ haiñ ham

jo bhī kahnā hai aaj kah lo tum

kyūñki is vaqt be-zabāñ haiñ ham

pur-fitan daur meñ bhī ai 'arshī'

rāh-e-haq par ravāñ-davāñ haiñ ham

bazm-e-'alam ke raaz-dan hain hum

ya'ni aaina-e-jahan hain hum

bagh-e-urdu ke baghban hain hum

lafz-o-ma'ni ke tarjuman hain hum

hum se qaem hain husn ki qadren

'ishq ki gard-e-karwan hain hum

jis se waqif na ho saki duniya

us mohabbat ki dastan hain hum

hum zamin-bos tum falak-andaz

tum kahan par ho aur kahan hain hum

jo bhi kahna hai aaj kah lo tum

kyunki is waqt be-zaban hain hum

pur-fitan daur mein bhi ai 'arshi'

rah-e-haq par rawan-dawan hain hum