bazm-e-dushman mein bulate ho ye kya karte ho

bazm-e-dushman meñ bulāte ho ye kyā karte ho

aur phir aañkh churāte ho ye kyā karte ho

ba.ad mere koī mujh sā na milegā tum ko

ḳhaak meñ kis ko milāte ho ye kyā karte ho

ham to dete nahīñ kuchh ye bhī zabardastī hai

chhīn kar dil liye jaate ho ye kyā karte ho

kar chuke bas mujhe pāmāl adū ke aage

kyuuñ mirī ḳhaak uḌāte ho ye kyā karte ho

chhīñTe paanī ke na do niiñd bharī āñkhoñ par

sote fitne ko jagāte ho ye kyā karte ho

ho na jaa.e kahīñ dāman kā chhuḌānā mushkil

mujh ko dīvāna banāte ho ye kyā karte ho

mohtasib ek balā-nosh hai ai pīr-e-muġhāñ

chaaT par kis ko lagāte ho ye kyā karte ho

kaam kyā dāġh-e-suvaidā kā hamāre dil par

naqsh-e-ulfat ko miTāte ho ye kyā karte ho

phir isī muñh pe nazākat kā karoge da.avā

ġhair ke naaz uThāte ho ye kyā karte ho

us sitam-kesh ke chakmoñ meñ na aanā 'beḳhud'

hāl-e-dil kis ko sunāte ho ye kyā karte ho

bazm-e-dushman mein bulate ho ye kya karte ho

aur phir aankh churaate ho ye kya karte ho

baad mere koi mujh sa na milega tum ko

KHak mein kis ko milate ho ye kya karte ho

hum to dete nahin kuchh ye bhi zabardasti hai

chhin kar dil liye jate ho ye kya karte ho

kar chuke bas mujhe pamal adu ke aage

kyun meri KHak uDate ho ye kya karte ho

chhinTe pani ke na do nind bhari aankhon par

sote fitne ko jagate ho ye kya karte ho

ho na jae kahin daman ka chhuDana mushkil

mujh ko diwana banate ho ye kya karte ho

mohtasib ek bala-nosh hai ai pir-e-mughan

chaT par kis ko lagate ho ye kya karte ho

kaam kya dagh-e-suwaida ka hamare dil par

naqsh-e-ulfat ko miTate ho ye kya karte ho

phir isi munh pe nazakat ka karoge dawa

ghair ke naz uThate ho ye kya karte ho

us sitam-kesh ke chakmon mein na aana 'beKHud'

haal-e-dil kis ko sunate ho ye kya karte ho