bazm-e-jaanan mein mohabbat ka asar dekhenge

bazm-e-jānāñ meñ mohabbat kā asar dekheñge

kis se miltī hai nazar un kī nazar dekheñge

ab na palkoñ pe Tiko TuuT ke barso ashko

un kā kahnā hai ki ham dīda-e-tar dekheñge

dhaḌkano tez chalo Dūbtī nabzo ubhro

aaj vo bujhte charāġhoñ kī sahar dekheñge

ai mire dil ke sulagte hue daġho bhaḌko

hijr kī raat vo jaltā huā ghar dekheñge

tere dar se hameñ ḳhairāt mile yā na mile

ham tire dar ke sivā koī na dar dekheñge

mai-kade jūmeñge barsegī javānī kī sharāb

vo chhalaktī huī nazroñ se jidhar dekheñge

un kī nazroñ se hai vābasta zamāne kī nazar

vo jidhar dekheñge sab log udhar dekheñge

aaj maazī ke fasāne vo suneñge ai 'charḳh'

merī barbād umīdoñ ke khañDar dekheñge

bazm-e-jaanan mein mohabbat ka asar dekhenge

kis se milti hai nazar un ki nazar dekhenge

ab na palkon pe Tiko TuT ke barso ashko

un ka kahna hai ki hum dida-e-tar dekhenge

dhaDkano tez chalo Dubti nabzo ubhro

aaj wo bujhte charaghon ki sahar dekhenge

ai mere dil ke sulagte hue dagho bhaDko

hijr ki raat wo jalta hua ghar dekhenge

tere dar se hamein KHairaat mile ya na mile

hum tere dar ke siwa koi na dar dekhenge

mai-kade jumenge barsegi jawani ki sharab

wo chhalakti hui nazron se jidhar dekhenge

un ki nazron se hai wabasta zamane ki nazar

wo jidhar dekhenge sab log udhar dekhenge

aaj mazi ke fasane wo sunenge ai 'charKH'

meri barbaad umidon ke khanDar dekhenge