bazm se dur rakha halqa-e-tanhai ne

bazm se duur rakhā halqa-e-tanhā.ī ne

mujh ko aane na diyā sat.h pe gahrā.ī ne

ab mire ḳhvāb alag haiñ mire ahbāb alag

is tarah mujh ko bikherā mirī yakjā.ī ne

jaane kyā sāniha guzrā ki parinde haiñ ḳhamosh

aur ik shor machā rakkhā hai añgnā.ī ne

merī nādānī uḌātī hai tamasḳhur merā

kis jagah lā ke Duboyā mujhe dānā.ī ne

bol uThā bol uThā shahr-e-ḳhamoshāñ 'ġhā.er'

vaah kyā kaam kiyā hai tirī goyā.ī ne

bazm se dur rakha halqa-e-tanhai ne

mujh ko aane na diya sath pe gahrai ne

ab mere KHwab alag hain mere ahbab alag

is tarah mujh ko bikhera meri yakjai ne

jaane kya saniha guzra ki parinde hain KHamosh

aur ek shor macha rakkha hai angnai ne

meri nadani uDati hai tamasKHur mera

kis jagah la ke Duboya mujhe danai ne

bol uTha bol uTha shahr-e-KHamoshan 'ghaer'

wah kya kaam kiya hai teri goyai ne