be-aman hun in dinon main dar-ba-dar phirta hun main

be-amāñ huuñ in dinoñ maiñ dar-ba-dar phirtā huuñ maiñ

maiñ mavaddat huuñ vafā huuñ ḳhair kā jazba huuñ maiñ

dil kī maujoñ meñ bapā kar ke talātum-ḳhezyāñ

apne andar kī zamīneñ kāTtā rahtā huuñ maiñ

khel hai sarkash havāoñ ke liye merā vajūd

kam-tanābī jis kī qismat hai vo ik ḳhema huuñ maiñ

hai mukammal vaqt ke sūraj pe merā inhisār

zindagī ke paañv se lipTā huā saaya huuñ maiñ

aisī hī be-chehragī chhā.ī huī hai shahr meñ

āp-apnā aks huuñ maiñ aap ā.īna huuñ maiñ

kab milegī mujh ko 'sārim' is aziyyat se najāt

zehn-o-dil kī kashmakash meñ raat din uljhā huuñ maiñ

be-aman hun in dinon main dar-ba-dar phirta hun main

main mawaddat hun wafa hun KHair ka jazba hun main

dil ki maujon mein bapa kar ke talatum-KHezyan

apne andar ki zaminen kaTta rahta hun main

khel hai sarkash hawaon ke liye mera wajud

kam-tanabi jis ki qismat hai wo ek KHema hun main

hai mukammal waqt ke suraj pe mera inhisar

zindagi ke panw se lipTa hua saya hun main

aisi hi be-chehragi chhai hui hai shahr mein

aap-apna aks hun main aap aaina hun main

kab milegi mujh ko 'sarim' is aziyyat se najat

zehn-o-dil ki kashmakash mein raat din uljha hun main