be-chehragi-e-gham se pareshan khaDe hain

be-chehragī-e-ġham se pareshān khaḌe haiñ

ham phir bhī vo zālim haiñ ki jiine par aḌe haiñ

ġham se jo buland aur masarrat se baḌe haiñ

aise bhī ka.ī daaġh mire dil pe paḌe haiñ

tārīḳh ke safhoñ pe jo insān baḌe haiñ

un meñ bahut aise haiñ jo lāshoñ pe khaḌe haiñ

kyā kyā na hameñ ghar kī udāsī se gila thā

ab shahr se nikle haiñ to hairān khaḌe haiñ

aa.ī na shikan merī jabīñ par rah-e-ġham meñ

kuchh aable paḌne the so talvoñ meñ paḌe haiñ

yādoñ ke ghane shahr meñ kyūñkar koī nikle

har fard ke pīchhe ka.ī afrād khaḌe haiñ

ronā to ye hai halqa-e-zanjīr kī sūrat

hālāt ke pairoñ meñ hamīñ log paḌe haiñ

sūraj jo chaḌhegā to simaT jā.eñge ye log

saa.e kī tarah qad se jo do haath baḌe haiñ

ham par jo guzartī hai use kis ko batā.eñ

tanhā.ī kī āġhosh meñ sadiyoñ se paḌe haiñ

hālāt ke pathrāv se bach nikleñ to jaano

shīshe kī tarah ham bhī framoñ meñ jaḌe haiñ

is daur-e-ḳhirad kā ye alamiyya hai ki insān

aap apnī hī lāsheñ liye kāñdhoñ pe khaḌe haiñ

sadiyāñ haiñ ki guzrī hī chalī jaatī haiñ 'nāzish'

haiñ roz-o-mah-o-sāl ki chup-chāp khaḌe haiñ

be-chehragi-e-gham se pareshan khaDe hain

hum phir bhi wo zalim hain ki jine par aDe hain

gham se jo buland aur masarrat se baDe hain

aise bhi kai dagh mere dil pe paDe hain

tariKH ke safhon pe jo insan baDe hain

un mein bahut aise hain jo lashon pe khaDe hain

kya kya na hamein ghar ki udasi se gila tha

ab shahr se nikle hain to hairan khaDe hain

aai na shikan meri jabin par rah-e-gham mein

kuchh aable paDne the so talwon mein paDe hain

yaadon ke ghane shahr mein kyunkar koi nikle

har fard ke pichhe kai afrad khaDe hain

rona to ye hai halqa-e-zanjir ki surat

haalat ke pairon mein hamin log paDe hain

suraj jo chaDhega to simaT jaenge ye log

sae ki tarah qad se jo do hath baDe hain

hum par jo guzarti hai use kis ko bataen

tanhai ki aaghosh mein sadiyon se paDe hain

haalat ke pathraw se bach niklen to jaano

shishe ki tarah hum bhi framon mein jaDe hain

is daur-e-KHirad ka ye alamiyya hai ki insan

aap apni hi lashen liye kandhon pe khaDe hain

sadiyan hain ki guzri hi chali jati hain 'nazish'

hain roz-o-mah-o-sal ki chup-chap khaDe hain