be-daKHl dil se maine kiya KHwahishat ko

be-daḳhl dil se maiñ ne kiyā ḳhvāhishāt ko

hairat meñ Daal aaya huuñ maiñ kā.enāt ko

qirtās kī dhamāl pe nazreñ jamā.iye

Tapkegā ḳhuun likhūñgā jab vārdāt ko

ham ne alag basā.ī hai duniyā fareb kī

paiġhām jā ke dījiye kiina sifāt ko

hai sātveñ jihat bhī koī to batā mujhe

dekhe hī jā rahā huuñ tirī shash-jihāt ko

tārīḳh-e-dīñ-faroshoñ meñ likhegī un kā naam

jo shakl de rahe haiñ na.e vāqi.āt ko

aa.e ajal daboch le qissa tamām ho

kis ne kahā tarastā huuñ āb-e-hayāt ko

ye ġhair kā nahīñ kisī apne kā kaam hai

pahchāntā huuñ apne parā.e ke haath ko

lagtā hai sukh kā saañs nahīñ aap ko 'azīz

'mājid' na tuul dījiye har ek baat ko

be-daKHl dil se main ne kiya KHwahishat ko

hairat mein Dal aaya hun main kaenat ko

qirtas ki dhamal pe nazren jamaiye

Tapkega KHun likhunga jab wardat ko

hum ne alag basai hai duniya fareb ki

paigham ja ke dijiye kina sifat ko

hai satwen jihat bhi koi to bata mujhe

dekhe hi ja raha hun teri shash-jihat ko

tariKH-e-din-faroshon mein likhegi un ka nam

jo shakl de rahe hain nae waqiat ko

aae ajal daboch le qissa tamam ho

kis ne kaha tarasta hun aab-e-hayat ko

ye ghair ka nahin kisi apne ka kaam hai

pahchanta hun apne parae ke hath ko

lagta hai sukh ka sans nahin aap ko 'aziz

'majid' na tul dijiye har ek baat ko