be-dili se hansne ko KHush-dili na samjha jae

be-dilī se hañsne ko ḳhush-dilī na samjhā jaa.e

ġham se jalte chehroñ ko raushnī na samjhā jaa.e

gaah gaah vahshat meñ ghar kī samt jaatā huuñ

is ko dasht-e-hairat se vāpsī na samjhā jaa.e

laakh ḳhush-gumāñ duniyā bāhamī ta.alluq ko

dostī kaheñ lekin dostī na samjhā jaa.e

ham to bas ye kahte haiñ roz jiine marne ko

aap chāheñ kuchh samjheñ zindagī na samjhā jaa.e

ḳhaak karne vāloñ kī kyā ajiib ḳhvāhish thī

ḳhaak hone vāloñ ko ḳhaak bhī na samjhā jaa.e

be-dili se hansne ko KHush-dili na samjha jae

gham se jalte chehron ko raushni na samjha jae

gah gah wahshat mein ghar ki samt jata hun

is ko dasht-e-hairat se wapsi na samjha jae

lakh KHush-guman duniya bahami talluq ko

dosti kahen lekin dosti na samjha jae

hum to bas ye kahte hain roz jine marne ko

aap chahen kuchh samjhen zindagi na samjha jae

KHak karne walon ki kya ajib KHwahish thi

KHak hone walon ko KHak bhi na samjha jae