be-intiha ho qurb magar is qadar na ho

be-intihā ho qurb magar is qadar na ho

ham jis pe mar rahe haiñ usī ko ḳhabar na ho

mauhūm sī sadā ho magar gūñjtī rahe

ik aam sī du'ā ho magar be-asar na ho

shānoñ kā zikr hote hī sar DhūñDte haiñ log

sar-garmī-e-jahān kī itnī ḳhabar na ho

shā'ir hī khīñch saktā hai paanī pe vo lakīr

aisī ki ek buuñd idhar se udhar na ho

bas do hī sūratoñ meñ nigāheñ haiñ mutma.in

un par nazar rahe yā kisī par nazar na ho

kis chāñd ne kahā thā ki rātoñ ko jāgiye

kab dhuup ne kahā thā ki sar par shajar na ho

is gumrahī meñ DhūñD na.ī manzileñ 'amit'

aglā qadam vahāñ ho jahāñ rah-guzar na ho

be-intiha ho qurb magar is qadar na ho

hum jis pe mar rahe hain usi ko KHabar na ho

mauhum si sada ho magar gunjti rahe

ek aam si du'a ho magar be-asar na ho

shanon ka zikr hote hi sar DhunDte hain log

sar-garmi-e-jahan ki itni KHabar na ho

sha'ir hi khinch sakta hai pani pe wo lakir

aisi ki ek bund idhar se udhar na ho

bas do hi suraton mein nigahen hain mutmain

un par nazar rahe ya kisi par nazar na ho

kis chand ne kaha tha ki raaton ko jagiye

kab dhup ne kaha tha ki sar par shajar na ho

is gumrahi mein DhunD nai manzilen 'amit'

agla qadam wahan ho jahan rah-guzar na ho