be-KHabar kaise koi raaz-e-nihan tak pahunche

be-ḳhabar kaise koī rāz-e-nihāñ tak pahuñche

baat dil se kahīñ nikle to zabāñ tak pahuñche

sāhibān-e-ḳhirad-o-hosh bhaTakte hī phire

aur dīvānoñ kā jī chāhā jahāñ tak pahuñche

tere dīvānoñ kī manzil koī manzil hī nahīñ

kyā ḳhabar un ko kahāñ aa.e kahāñ tak pahuñche

in mazālim kā ye anjām na.ī baat nahīñ

saiñkaḌoñ baar qayāmat ke nishāñ tak pahuñche

rāhbar koī na thā aur nishānāt na the

dil ḳhizar ban ke chalā hai to vahāñ tak pahuñche

ḳhaak hī ḳhaak nazar aaya hameñ apnā vajūd

bhes badle hue go bazm-e-jahāñ tak pahuñche

terī ejāz-bayānī ke ye charche 'ejāz'

ab to har bazm meñ har ahl-e-zabāñ tak pahuñche

be-KHabar kaise koi raaz-e-nihan tak pahunche

baat dil se kahin nikle to zaban tak pahunche

sahiban-e-KHirad-o-hosh bhaTakte hi phire

aur diwanon ka ji chaha jahan tak pahunche

tere diwanon ki manzil koi manzil hi nahin

kya KHabar un ko kahan aae kahan tak pahunche

in mazalim ka ye anjam nai baat nahin

sainkaDon bar qayamat ke nishan tak pahunche

rahbar koi na tha aur nishanat na the

dil KHizar ban ke chala hai to wahan tak pahunche

KHak hi KHak nazar aaya hamein apna wajud

bhes badle hue go bazm-e-jahan tak pahunche

teri ejaz-bayani ke ye charche 'ejaz'

ab to har bazm mein har ahl-e-zaban tak pahunche