be-KHayali mein kaha tha ki shanasai nahin

be-ḳhayālī meñ kahā thā ki shanāsā.ī nahīñ

zindagī ruuTh ga.ī lauT ke phir aa.ī nahīñ

jo samajhnā hī na chāhe use samjhā.ī nahīñ

jo bhī ik baar kahī baat vo dohrā.ī nahīñ

husn saada hai tirā maiñ bhī bahut aam sī huuñ

merī āñkhoñ meñ kisī niil kī gahrā.ī nahīñ

merā hissa mujhe ḳhāmoshī se de detā hai

dard ke aage hathelī kabhī phailā.ī nahīñ

apne afkār liye pahlū-nashīñ ho ke rahā

dil se darvesh ne duniyā tirī apnā.ī nahīñ

shab ke tārīk laboñ par hai ka.ī saal kī chup

ḳhud se nārāz hai itnī kabhī muskā.ī nahīñ

baas phūloñ kī churā lī hai havāoñ ne magar

jo kalī yaad kī terī hai vo murjhā.ī nahīñ

aag ye donoñ taraf kyuuñ na barābar sī lage

haa.e vo ishq hī kyā jis meñ pazīrā.ī nahīñ

be-irāda bhī koī kaam ta.attul na paḌā

bā-irāda thī mulāqāt kī shab aa.ī nahīñ

be-KHayali mein kaha tha ki shanasai nahin

zindagi ruTh gai lauT ke phir aai nahin

jo samajhna hi na chahe use samjhai nahin

jo bhi ek bar kahi baat wo dohrai nahin

husn sada hai tera main bhi bahut aam si hun

meri aankhon mein kisi nil ki gahrai nahin

mera hissa mujhe KHamoshi se de deta hai

dard ke aage hatheli kabhi phailai nahin

apne afkar liye pahlu-nashin ho ke raha

dil se darwesh ne duniya teri apnai nahin

shab ke tarik labon par hai kai sal ki chup

KHud se naraaz hai itni kabhi muskai nahin

bas phulon ki chura li hai hawaon ne magar

jo kali yaad ki teri hai wo murjhai nahin

aag ye donon taraf kyun na barabar si lage

hae wo ishq hi kya jis mein pazirai nahin

be-irada bhi koi kaam tattul na paDa

ba-irada thi mulaqat ki shab aai nahin