be-KHud hain be-KHudi ki saza pa rahe hain hum

be-ḳhud haiñ be-ḳhudī kī sazā pā rahe haiñ ham

misl-e-habāb ban ke miTe jā rahe haiñ ham

ma.abūd kaun mashq-e-ibādat the kis liye

nāhaq ye bojh sar pe liye jā rahe haiñ ham

vaa.iz sharāb piine de ham se gila na kar

saaqī pilā rahā hai piye jā rahe haiñ ham

hogī tirī guzar na kabhī jis dayār meñ

zāhid hameñ na chheḌ vahīñ jā rahe haiñ ham

'ānand' ke karishme sabhī soz-o-sāz haiñ

har nai meñ saut-e-ġhaib sune jā rahe haiñ ham

be-KHud hain be-KHudi ki saza pa rahe hain hum

misl-e-habab ban ke miTe ja rahe hain hum

mabud kaun mashq-e-ibaadat the kis liye

nahaq ye bojh sar pe liye ja rahe hain hum

waiz sharab pine de hum se gila na kar

saqi pila raha hai piye ja rahe hain hum

hogi teri guzar na kabhi jis dayar mein

zahid hamein na chheD wahin ja rahe hain hum

'anand' ke karishme sabhi soz-o-saz hain

har nai mein saut-e-ghaib sune ja rahe hain hum