be-lutf hai ye soch ki sauda nahin raha

be-lutf hai ye soch ki saudā nahīñ rahā

āñkheñ nahīñ rahīñ ki tamāshā nahīñ rahā

duniyā ko raas aa ga.iiñ ātish-parastiyāñ

pahle dimāġh-e-lāla-o-gul thā nahīñ rahā

fursat kahāñ ki soch ke kuchh gungunā.iye

koī kahīñ halāk-e-tamannā nahīñ rahā

ūñchī imāratoñ ne to vahshat ḳharīd lī

kuchh bach ga.ī to gosha-e-sahrā nahīñ rahā

dil mil gayā to vo utar aayā zamīn par

aahaT milī qadam kī to rasta nahīñ rahā

girdāb chīḳhtā hai ki dariyā udaas hai

dariyā ye kah rahā hai kinārā nahīñ rahā

miTTī se aag aag se gul gul se āftāb

terā ḳhayāl shahpar-e-tanhā nahīñ rahā

bātil ye e'tirāz ki tujh se lipaT gayā

mujh ko nashe meñ hosh kisī kā nahīñ rahā

ik baar yuuñ hī dekh liyā thā ḳhirām-e-nāz

phir lab pe naam sarv o saman kā nahīñ rahā

be-lutf hai ye soch ki sauda nahin raha

aankhen nahin rahin ki tamasha nahin raha

duniya ko ras aa gain aatish-parastiyan

pahle dimagh-e-lala-o-gul tha nahin raha

fursat kahan ki soch ke kuchh gungunaiye

koi kahin halak-e-tamanna nahin raha

unchi imaraton ne to wahshat KHarid li

kuchh bach gai to gosha-e-sahra nahin raha

dil mil gaya to wo utar aaya zamin par

aahaT mili qadam ki to rasta nahin raha

girdab chiKHta hai ki dariya udas hai

dariya ye kah raha hai kinara nahin raha

miTTi se aag aag se gul gul se aaftab

tera KHayal shahpar-e-tanha nahin raha

baatil ye e'tiraaz ki tujh se lipaT gaya

mujh ko nashe mein hosh kisi ka nahin raha

ek bar yun hi dekh liya tha KHiram-e-naz

phir lab pe nam sarw o saman ka nahin raha