be-mehri-e-qaza ke satae hue hain hum

be-mehrī-e-qazā ke satā.e hue haiñ ham

ilzām zindagī kā uThā.e hue haiñ ham

husn-e-sulūk-e-yār kā e.ajāz kyā kaheñ

sau daaġh ek dil pe uThā.e hue haiñ ham

ab kis se le qisās zamāne meñ munsifī

apne lahū meñ aap nahā.e hue haiñ ham

patthar ke ik sanam ko ba-sad nāz-o-tumturāq

shīshe ke pairahan meñ chhupā.e hue haiñ ham

jhuktī haiñ kaj-kulāhoñ kī peshāniyāñ jahāñ

us āshiyāñ meñ sar ko jhukā.e hue haiñ ham

hairāñ haiñ vo ki aise havasnāk daur meñ

tahzīb-e-ishq ab bhī nibhā.e hue haiñ ham

ashkoñ ke ghup gharoñ meñ thā aaseb kā ḳhatar

āñkhoñ ke diip yuuñ na jalā.e hue haiñ

is TūTte badan meñ vo Thahrāv hai sahar

janmoñ se bār-e-hijr uThā.e hue haiñ ham

hastī ke kārḳhāna-e-āhan meñ ai 'sahar'

zanjīr-e-jāñ ko ġham se lagā.e hue haiñ ham

be-mehri-e-qaza ke satae hue hain hum

ilzam zindagi ka uThae hue hain hum

husn-e-suluk-e-yar ka eajaz kya kahen

sau dagh ek dil pe uThae hue hain hum

ab kis se le qisas zamane mein munsifi

apne lahu mein aap nahae hue hain hum

patthar ke ek sanam ko ba-sad naz-o-tumturaq

shishe ke pairahan mein chhupae hue hain hum

jhukti hain kaj-kulahon ki peshaniyan jahan

us aashiyan mein sar ko jhukae hue hain hum

hairan hain wo ki aise hawasnak daur mein

tahzib-e-ishq ab bhi nibhae hue hain hum

ashkon ke ghup gharon mein tha aaseb ka KHatar

aankhon ke dip yun na jalae hue hain

is TuTte badan mein wo Thahraw hai sahar

janmon se bar-e-hijr uThae hue hain hum

hasti ke karKHana-e-ahan mein ai 'sahar'

zanjir-e-jaan ko gham se lagae hue hain hum