be-nam saaton ka safar KHatm ho chala

be-nām sā.atoñ kā safar ḳhatm ho chalā

lo imtihān-e-fikr-o-nazar ḳhatm ho chalā

vaañ tīrgī-e-mahfil-e-yārāñ na miT sakī

yaañ roġhan-e-charāġh-e-hunar ḳhatm ho chalā

ehsān hai mashiyyat-e-parvardigār kā

hañgāma-e-hayāt-e-bashar ḳhatm ho chalā

mai-ḳhāna-e-hayāt se rindo nikal chalo

paimāna-e-duā kā asar ḳhatm ho chalā

ai jān-e-intizār nayā zaḳhm de mujhe

lutf-e-bahār-e-dīda-e-tar ḳhatm ho chalā

dikhlā ke āftāb-e-daraḳhshāñ kī ik jhalak

afsāna-e-numūd-e-sahar ḳhatm ho chalā

us ne ik aur dāġh-e-jigar de diyā 'sabā'

jab e'tibār-e-soz-e-jigar ḳhatm ho chalā

be-nam saaton ka safar KHatm ho chala

lo imtihan-e-fikr-o-nazar KHatm ho chala

wan tirgi-e-mahfil-e-yaran na miT saki

yan roghan-e-charagh-e-hunar KHatm ho chala

ehsan hai mashiyyat-e-parwardigar ka

hangama-e-hayat-e-bashar KHatm ho chala

mai-KHana-e-hayat se rindo nikal chalo

paimana-e-dua ka asar KHatm ho chala

ai jaan-e-intizar naya zaKHm de mujhe

lutf-e-bahaar-e-dida-e-tar KHatm ho chala

dikhla ke aaftab-e-daraKHshan ki ek jhalak

afsana-e-numud-e-sahar KHatm ho chala

us ne ek aur dagh-e-jigar de diya 'saba'

jab e'tibar-e-soz-e-jigar KHatm ho chala