be-niyaz-e-sukun-e-manzil hai

be-niyāz-e-sukūn-e-manzil hai

zindagī irtiqā pe maa.il hai

gum hai yuuñ fikr-e-kā.enāt meñ dil

yād-e-mahbūb se bhī ġhāfil hai

fan faqat husn ko nahīñ kahte

is meñ ḳhūn-e-jigar bhī shāmil hai

tujh pe qurbān ai ġham-e-daurāñ

tū mirī zindagī kā hāsil hai

aap kyā jāneñ shorish-e-tūfāñ

aap kā dil rahīn-e-sāhil hai

aao kirnoñ ke khoj meñ nikleñ

tīrgī se nibāh mushkil hai

aap apne zamīr se sharmā.eñ

aa.ina aap ke muqābil hai

be-niyaz-e-sukun-e-manzil hai

zindagi irtiqa pe mail hai

gum hai yun fikr-e-kaenat mein dil

yaad-e-mahbub se bhi ghafil hai

fan faqat husn ko nahin kahte

is mein KHun-e-jigar bhi shamil hai

tujh pe qurban ai gham-e-dauran

tu meri zindagi ka hasil hai

aap kya jaanen shorish-e-tufan

aap ka dil rahin-e-sahil hai

aao kirnon ke khoj mein niklen

tirgi se nibah mushkil hai

aap apne zamir se sharmaen

aaina aap ke muqabil hai