be-qasd safar jate hain malum nahin kyun

be-qasd safar jaate haiñ ma.alūm nahīñ kyuuñ

phir ḳhud hī Thahar jaate haiñ ma.alūm nahīñ kyuuñ

ham pyaar se jiine kī duā dete haiñ jin ko

vo log bhī mar jaate haiñ ma.alūm nahīñ kyuuñ

kuchh log tujhe dekh ke ai fasl-e-bahārāñ

bā-dīda-e-tar jaate haiñ ma.alūm nahīñ kyuuñ

ik vahm samajhte the haqīqat ko jo kal tak

ab ḳhvāb se Dar jaate haiñ ma.alūm nahīñ kyuuñ

utre hue chehroñ ko bhī ye kahte sunā hai

kuchh ham se bhī Dar jaate haiñ ma.alūm nahīñ kyuuñ

ik silsila ashk hai shabnam magar is se

gulzār nikhar jaate haiñ ma.alūm nahīñ kyuuñ

manzil kī taraf rāh-e-mohabbat ke musāfir

be-raḳht-e-safar jaate haiñ ma.alūm nahīñ kyuuñ

kuchh dekh ke kuchh soch ke kuchh log jahāñ se

chup-chāp guzar jaate haiñ ma.alūm nahīñ kyuuñ

kashtī ko Dubo kar usī kashtī ke muhāfiz

ḳhud paar utar jaate haiñ ma.alūm nahīñ kyuuñ

ghar meñ koī ārām kī sūrat nahīñ phir bhī

thak-hār ke ghar jaate haiñ ma.alūm nahīñ kyuuñ

haañ aks-e-ruḳh-e-sañg-zada se bhī to ai 'lais'

ā.īne sañvar jaate haiñ ma.alūm nahīñ kyuuñ

be-qasd safar jate hain malum nahin kyun

phir KHud hi Thahar jate hain malum nahin kyun

hum pyar se jine ki dua dete hain jin ko

wo log bhi mar jate hain malum nahin kyun

kuchh log tujhe dekh ke ai fasl-e-bahaaran

ba-dida-e-tar jate hain malum nahin kyun

ek wahm samajhte the haqiqat ko jo kal tak

ab KHwab se Dar jate hain malum nahin kyun

utre hue chehron ko bhi ye kahte suna hai

kuchh hum se bhi Dar jate hain malum nahin kyun

ek silsila ashk hai shabnam magar is se

gulzar nikhar jate hain malum nahin kyun

manzil ki taraf rah-e-mohabbat ke musafir

be-raKHt-e-safar jate hain malum nahin kyun

kuchh dekh ke kuchh soch ke kuchh log jahan se

chup-chap guzar jate hain malum nahin kyun

kashti ko Dubo kar usi kashti ke muhafiz

KHud par utar jate hain malum nahin kyun

ghar mein koi aaram ki surat nahin phir bhi

thak-haar ke ghar jate hain malum nahin kyun

han aks-e-ruKH-e-sang-zada se bhi to ai 'lais'

aaine sanwar jate hain malum nahin kyun