be-ruKH hai wo pari dil-e-diwana kya kare

be-ruḳh hai vo parī dil-e-dīvāna kyā kare

ro ro ke aañkh bhartī hai paimāna kyā kare

dast-o-zabān-o-dīda-o-dil detī haiñ duā

karte haiñ vo yagāne ki begāna kyā kare

kahtā hī murġh-e-dil se vo hāl-e-myān-e-ḳhat

sabza jo daam ho to use daana kyā kare

bebas kiyā hai mujh ko sar-e-zulf-e-yār ne

zanjīr paañv meñ ho to dīvāna kyā kare

jaadū hai aañkh surma na kyūñ-kar rahe ḳhamosh

sarkash hī zulf kāñdhe na de shāna kyā kare

dil ko na daaġh dījiye bose kī chaaT par

jo bechtā na hove vo bai.āna kyā kare

be-ruKH hai wo pari dil-e-diwana kya kare

ro ro ke aankh bharti hai paimana kya kare

dast-o-zaban-o-dida-o-dil deti hain dua

karte hain wo yagane ki begana kya kare

kahta hi murgh-e-dil se wo haal-e-myan-e-KHat

sabza jo dam ho to use dana kya kare

bebas kiya hai mujh ko sar-e-zulf-e-yar ne

zanjir panw mein ho to diwana kya kare

jadu hai aankh surma na kyun-kar rahe KHamosh

sarkash hi zulf kandhe na de shana kya kare

dil ko na dagh dijiye bose ki chaT par

jo bechta na howe wo baiana kya kare