be-ruKHi se qabl ulfat mein musibat kam na thi

be-ruḳhī se qabl ulfat meñ musībat kam na thī

un se kuchh taskīn thī varna aziyyat kam na thī

inqilāb-e-dahr se hai un kī ye begāngī

varna ham se bhī kabhī sāhab-salāmat kam na thī

husn-e-insāñ aarzī hai iltifāt-e-husn bhī

un ke dil meñ bhī kabhī merī mohabbat kam na thī

ham ḳhudā ko DhūñDh lete raah par chalte agar

jazba-e-dil kam na thā duniyā meñ fursat kam na thī

ho ke ham nākām samjhe pyaar ke qābil thā kaun

har qadam par yuuñ to ulfat meñ nasīhat kam na thī

vo to the dil meñ makīñ ham DhūñDh laate arsh se

ham meñ himmat kam na thī dil meñ aqīdat kam na thī

ashk ho kar rah ga.e nā-qadr-dānī kā shikār

qadr-dāñ miltā 'shifā' to in kī qīmat kam na thī

be-ruKHi se qabl ulfat mein musibat kam na thi

un se kuchh taskin thi warna aziyyat kam na thi

inqilab-e-dahr se hai un ki ye begangi

warna hum se bhi kabhi sahab-salamat kam na thi

husn-e-insan aarzi hai iltifat-e-husn bhi

un ke dil mein bhi kabhi meri mohabbat kam na thi

hum KHuda ko DhunDh lete rah par chalte agar

jazba-e-dil kam na tha duniya mein fursat kam na thi

ho ke hum nakaam samjhe pyar ke qabil tha kaun

har qadam par yun to ulfat mein nasihat kam na thi

wo to the dil mein makin hum DhunDh late arsh se

hum mein himmat kam na thi dil mein aqidat kam na thi

ashk ho kar rah gae na-qadr-dani ka shikar

qadr-dan milta 'shifa' to in ki qimat kam na thi