be-sabab hi jaane kis kis ko KHafa karte rahe

be-sabab hī jaane kis kis ko ḳhafā karte rahe

kyoñ kisī ke rū-ba-rū ham aa.ina karte rahe

log tadbīroñ se hangāme bapā karte rahe

aur ham jabr-e-mashiyyat kā gila karte rahe

vaa.e majbūrī ki hoñToñ par na aa.ī dil kī baat

laakh ham sa.ī-e-bayān-e-mudda.ā karte rahe

ġhāliban ye bhī hamārā imtihāñ thā bazm meñ

log rah rah kar tumhārā tazkira karte rahe

un kī ḳhātir is takalluf kī kisī ko kyā ḳhabar

kis liye apne lahū ko ham hinā karte rahe

har nafas ke saath juuñ juuñ umr kam hotī ga.ī

muḳhtasar ham zindagī kā rāsta karte rahe

aur bhī dushvār ab ḳhud ko samajhnā ho gayā

hosh ke aalam se 'afzal' ham bhī kyā karte rahe

be-sabab hi jaane kis kis ko KHafa karte rahe

kyon kisi ke ru-ba-ru hum aaina karte rahe

log tadbiron se hangame bapa karte rahe

aur hum jabr-e-mashiyyat ka gila karte rahe

wae majburi ki honTon par na aai dil ki baat

lakh hum sai-e-bayan-e-muddaa karte rahe

ghaaliban ye bhi hamara imtihan tha bazm mein

log rah rah kar tumhaara tazkira karte rahe

un ki KHatir is takalluf ki kisi ko kya KHabar

kis liye apne lahu ko hum hina karte rahe

har nafas ke sath jun jun umr kam hoti gai

muKHtasar hum zindagi ka rasta karte rahe

aur bhi dushwar ab KHud ko samajhna ho gaya

hosh ke aalam se 'afzal' hum bhi kya karte rahe