be-wafaon ko wafaon ka KHuda humne kaha

be-vafāoñ ko vafāoñ kā ḳhudā ham ne kahā

kyā hameñ kahnā thā ai dil aur kyā ham ne kahā

lab ko ġhuncha zulf ko kālī-ghaTā ham ne kahā

dil ne ham ko jo bhī kahne ko kahā ham ne kahā

kis qadar majbūr hoñge us ghaḌī ham ai ḳhudā

jab tire be-faiz bandoñ ko ḳhudā ham ne kahā

daad denā tum hamārī chashm-poshī kī hameñ

raah meñ jo gum the un ko rahnumā ham ne kahā

jab marīz-e-ishq ko koī davā aa.ī na raas

dard hī ko dard kī āḳhir davā ham ne kahā

gir gayā apnī nigāhoñ meñ hī apnā sab vaqār

jab sar-e-bāzār khoTe ko kharā ham ne kahā

be-wafaon ko wafaon ka KHuda hum ne kaha

kya hamein kahna tha ai dil aur kya hum ne kaha

lab ko ghuncha zulf ko kali-ghaTa hum ne kaha

dil ne hum ko jo bhi kahne ko kaha hum ne kaha

kis qadar majbur honge us ghaDi hum ai KHuda

jab tere be-faiz bandon ko KHuda hum ne kaha

dad dena tum hamari chashm-poshi ki hamein

rah mein jo gum the un ko rahnuma hum ne kaha

jab mariz-e-ishq ko koi dawa aai na ras

dard hi ko dard ki aaKHir dawa hum ne kaha

gir gaya apni nigahon mein hi apna sab waqar

jab sar-e-bazar khoTe ko khara hum ne kaha