bech kar tahzib daulat ke pujari ho gae

bech kar tahzīb daulat ke pujārī ho ga.e

is zamāne ke suḳhanvar bhī madārī ho ga.e

rakh ke vo mīzān par dīvān apnā ro paḌe

jab kisī ke be-sure alfāz bhārī ho ga.e

ham ne ik mandir meñ dekhī aaj aisī mūrtī

aadmī to aadmī patthar pujārī ho ga.e

inqalāb aaya to hai lekin ye kaisā inqalāb

chīñtiyoñ ko mārne vaale shikārī ho ga.e

ishq ke bāzār se lauTe haiñ dil ko haar kar

dīn-o-īmāñ tum sa.mbhālo ham juārī ho ga.e

kaun samjhā.e samundar ke thapeḌoñ ko 'fahīm'

kaise kaise vaqt ke aage bhikārī ho ga.e

bech kar tahzib daulat ke pujari ho gae

is zamane ke suKHanwar bhi madari ho gae

rakh ke wo mizan par diwan apna ro paDe

jab kisi ke be-sure alfaz bhaari ho gae

hum ne ek mandir mein dekhi aaj aisi murti

aadmi to aadmi patthar pujari ho gae

inqalab aaya to hai lekin ye kaisa inqalab

chintiyon ko marne wale shikari ho gae

ishq ke bazar se lauTe hain dil ko haar kar

din-o-iman tum sambhaalo hum juari ho gae

kaun samjhae samundar ke thapeDon ko 'fahim'

kaise kaise waqt ke aage bhikari ho gae