bedad hai nai to sitam bhi nae nae

bedād hai na.ī to sitam bhī na.e na.e

khāte haiñ zaḳhm sahte haiñ ġham bhī na.e na.e

but-gar na.e na.e haiñ qalam bhī na.e na.e

haiñ but-shikan na.e to sanam bhī na.e na.e

Dar hai ki kho na jaa.eñ zamāne kī bhiiḌ meñ

tum jo na.e na.e ho to ham bhī na.e na.e

kyoñ ho ga.ī vatan kī fazā is qadar ḳharāb

na.are na.e na.e haiñ alam bhī na.e na.e

dāman pe un ke daaġh hamāre lahū ke haiñ

fitne uThā rahe haiñ qadam bhī na.e na.e

jiinā nahīñ to maut se ham kyoñ laḌeñ 'habīb'

milte haiñ ab tarīq-e-adam bhī na.e na.e

bedad hai nai to sitam bhi nae nae

khate hain zaKHm sahte hain gham bhi nae nae

but-gar nae nae hain qalam bhi nae nae

hain but-shikan nae to sanam bhi nae nae

Dar hai ki kho na jaen zamane ki bhiD mein

tum jo nae nae ho to hum bhi nae nae

kyon ho gai watan ki faza is qadar KHarab

nare nae nae hain alam bhi nae nae

daman pe un ke dagh hamare lahu ke hain

fitne uTha rahe hain qadam bhi nae nae

jina nahin to maut se hum kyon laDen 'habib'

milte hain ab tariq-e-adam bhi nae nae