'bedil' kā taḳhayyul huuñ na ġhālib kī navā huuñ
is qāfila-e-rafta kā naqsh-e-kaf-e-pā huuñ
raqsāñ hai charāġhān-e-tamannā mire harsū
vo raushaniyāñ haiñ ki maiñ saa.e se judā huuñ
jab dasht-e-alam se koī jhoñkā kabhī aayā
maiñ lāla-e-ḳhud-rav kī tarah aur khilā huuñ
zulmāt-amāñ bhī huuñ ujāloñ kā amiiñ bhī
maiñ sub.h ke taare kī tarah Duub rahā huuñ
aflāk-rasī se bhī talāfī nahīñ hotī
kis azm kī an-dekhī chaTānoñ se girā huuñ
har aks-e-muqābil se numāyāñ hai mirā naqsh
duniyā meñ huuñ yā ā.ina-ḳhāne meñ khaḌā huuñ
mahdūd hai kyuuñ hadd-e-talab tak mirī parvāz
maiñ mauj-e-sabā ho ke bhī zanjīr-ba-pā huuñ
idrāk ke sho.aloñ kā chaman hai mirā āhañg
maiñ barg-e-ḳhizāñ ho ke bhī gulzār-numā huuñ
ehsās ke ġhunchoñ kī chaTak hai mirī āvāz
maiñ sīna-e-āfāq meñ dhaḌkan kī sadā huuñ
har chand ki nas nas meñ nihāñ barq-e-tapāñ hai
khul kar bhī barastā huuñ ki ghanghor ghaTā huuñ
ek ek kiran meñ tire sau rañg nazar aa.e
jab pichhle pahar chāñd ke hamrāh chalā huuñ
ik naġhma-e-rañgīñ huuñ lab-e-sāz-e-mizha par
'sādiq' jaras-e-ġhuncha huuñ tasvīr-e-sadā huuñ
'bedil' ka taKHayyul hun na ghaalib ki nawa hun
is qafila-e-rafta ka naqsh-e-kaf-e-pa hun
raqsan hai charaghan-e-tamanna mere harsu
wo raushaniyan hain ki main sae se juda hun
jab dasht-e-alam se koi jhonka kabhi aaya
main lala-e-KHud-raw ki tarah aur khila hun
zulmat-aman bhi hun ujalon ka amin bhi
main subh ke tare ki tarah Dub raha hun
aflak-rasi se bhi talafi nahin hoti
kis azm ki an-dekhi chaTanon se gira hun
har aks-e-muqabil se numayan hai mera naqsh
duniya mein hun ya aaina-KHane mein khaDa hun
mahdud hai kyun hadd-e-talab tak meri parwaz
main mauj-e-saba ho ke bhi zanjir-ba-pa hun
idrak ke shoalon ka chaman hai mera aahang
main barg-e-KHizan ho ke bhi gulzar-numa hun
ehsas ke ghunchon ki chaTak hai meri aawaz
main sina-e-afaq mein dhaDkan ki sada hun
har chand ki nas nas mein nihan barq-e-tapan hai
khul kar bhi barasta hun ki ghanghor ghaTa hun
ek ek kiran mein tere sau rang nazar aae
jab pichhle pahar chand ke hamrah chala hun
ek naghma-e-rangin hun lab-e-saz-e-mizha par
'sadiq' jaras-e-ghuncha hun taswir-e-sada hun
Source:
Funoon(Jadeed Ghazal Number: Volume-002) (Pg. 469)
-
- Edition: 1969
- Publisher: Ahmad Nadeem Qasmi
- Year of Publication: 1969
Additional information available
Click on the INTERESTING button to view additional information associated with this sher.
rare Unpublished content
This ghazal contains ashaar not published in the public domain. These are marked by a red line on the left.