beganagi ke baam se pal-bhar utar ke dekh

begānagī ke baam se pal-bhar utar ke dekh

maiñ kaun huuñ mujhe bhī zarā aañkh bhar ke dekh

kyuuñ bad-gumāñ hai ḳhalq-e-ḳhudā terī zaat se

logoñ meñ baiTh aur zarā baat kar ke dekh

aisī kiran ki joḌ sake rishta-e-badan

in zulmatoñ meñ fāsle qalb-o-nazar ke dekh

dasht-e-balā meñ kitne bagūle haiñ ghaat meñ

maiñ to guzar chukā zarā tū bhī guzar ke dekh

e.azāz-e-khusravī se na merī vafā ko naap

fursat mile kabhī to mire zaḳhm sar ke dekh

kis zahr ke asar se ulajhtī hai merī saañs

dam bhar dhuāñ dhuāñ sī fazā meñ Thahar ke dekh

'shāhīñ' vo gaañv phir tirī qismat meñ ho na ho

behtar hai ḳhvāb ujḌe hue bām-o-dar ke dekh

beganagi ke baam se pal-bhar utar ke dekh

main kaun hun mujhe bhi zara aankh bhar ke dekh

kyun bad-guman hai KHalq-e-KHuda teri zat se

logon mein baiTh aur zara baat kar ke dekh

aisi kiran ki joD sake rishta-e-badan

in zulmaton mein fasle qalb-o-nazar ke dekh

dasht-e-bala mein kitne bagule hain ghat mein

main to guzar chuka zara tu bhi guzar ke dekh

eazaz-e-khusrawi se na meri wafa ko nap

fursat mile kabhi to mere zaKHm sar ke dekh

kis zahr ke asar se ulajhti hai meri sans

dam bhar dhuan dhuan si faza mein Thahar ke dekh

'shahin' wo ganw phir teri qismat mein ho na ho

behtar hai KHwab ujDe hue baam-o-dar ke dekh