beja hai rah-e-ishq mein ai dil gila-e-pa

bejā hai rah-e-ishq meñ ai dil gila-e-pā

ye aur hī manzil hai nahīñ marhala-e-pā

hañgām-e-ḳhirām us ke hujūm-e-dil-e-ushshāq

ġhash-karda haiñ Thokar ke bahar-fāsla-e-pā

kal bosa-e-pā ham ne liyā thā so na aayā

shāyad ki vo bosa hī huā ābla-e-pā

us pā kī rah-e-rashk meñ nāzuk qadmoñ ke

phirte haiñ bhaTakte hue sau qāfila-e-pā

sau naaz se Thokar ba-sar-e-arsh lagānā

us gul ke sivā kis kā hai ye hausla-e-pā

gul-barg pe rakhte hī qadam hañs ke jo khīñchā

shāyad huī saḳhtī se rag-e-gul ḳhila-e-pā

dil se rah-e-dil-bastagī kab tai ho 'nazīr' aah

vo zulf-e-musalsal jo na ho silsila-e-pā

beja hai rah-e-ishq mein ai dil gila-e-pa

ye aur hi manzil hai nahin marhala-e-pa

hangam-e-KHiram us ke hujum-e-dil-e-ushshaq

ghash-karda hain Thokar ke bahar-fasla-e-pa

kal bosa-e-pa hum ne liya tha so na aaya

shayad ki wo bosa hi hua aabla-e-pa

us pa ki rah-e-rashk mein nazuk qadmon ke

phirte hain bhaTakte hue sau qafila-e-pa

sau naz se Thokar ba-sar-e-arsh lagana

us gul ke siwa kis ka hai ye hausla-e-pa

gul-barg pe rakhte hi qadam hans ke jo khincha

shayad hui saKHti se rag-e-gul KHila-e-pa

dil se rah-e-dil-bastagi kab tai ho 'nazir' aah

wo zulf-e-musalsal jo na ho silsila-e-pa