betab-o-muztarib nazar aati hain aandhiyan

betāb-o-muztarib nazar aatī haiñ āñdhiyāñ

garmī dikhā rahī hai mirī ḳhāk-e-āshiyāñ

uf vo nigāh-e-nāz kī afsūñ-tarāziyāñ

rag rag meñ dauḌtī haiñ mohabbat kī bijliyāñ

uf vo ḳhirām-e-nāz kī mahshar-ḳhirāmiyāñ

pāmāl-e-ārzū huiiñ kitnī javāniyāñ

badlā huā zarūr hai andāz-e-guftugū

chhuptī nahīñ haiñ aap ke lahje kī talḳhiyāñ

saa.e meñ zulf-e-yār ke guzrī hai zindagī

jhelī kahāñ haiñ aap ne zindāñ kī saḳhtiyāñ

jab tak ġham-o-alam ne sahārā nahīñ diyā

dekhīñ kahāñ hayāt kī ham ne tajalliyāñ

'faizī' hai koī mujh sā zamāne meñ bad-nasīb

mere hī dost karte haiñ merī burā.iyāñ

betab-o-muztarib nazar aati hain aandhiyan

garmi dikha rahi hai meri KHak-e-ashiyan

uf wo nigah-e-naz ki afsun-taraaziyan

rag rag mein dauDti hain mohabbat ki bijliyan

uf wo KHiram-e-naz ki mahshar-KHiramiyan

pamal-e-arzu huin kitni jawaniyan

badla hua zarur hai andaz-e-guftugu

chhupti nahin hain aap ke lahje ki talKHiyan

sae mein zulf-e-yar ke guzri hai zindagi

jheli kahan hain aap ne zindan ki saKHtiyan

jab tak gham-o-alam ne sahaara nahin diya

dekhin kahan hayat ki hum ne tajalliyan

'faizi' hai koi mujh sa zamane mein bad-nasib

mere hi dost karte hain meri buraiyan