betab se betab teri tab le aae

betāb se betāb tirī taab le aa.e

jiinā paḌā aisoñ ko bhī jo jī nahīñ paa.e

bāteñ vahī bāteñ vo na bolī huī bāteñ

is tezī se lagtī haiñ ki allāh bachā.e

dikhtī rahī phailī huī gardūñ kī siyāhī

kitne hī sitāre mirī āñkhoñ ne ginā.e

tā'rīf bhī aisī hameñ karnī nahīñ aa.ī

alfāz bhī aise muta'addid hī banā.e

yak-laḳht uñDele ga.e ham hosh meñ har baar

jaate hue ḳhvāboñ ko kabhī dekh na paa.e

jānoge to jānam tumheñ jaane nahīñ deñge

behtar hai in auhām ko jaane diyā jaa.e

āvāz se paivasta ik andāz hai 'āmir'

andāz kā andāza magar kaun lagā.e

betab se betab teri tab le aae

jina paDa aison ko bhi jo ji nahin pae

baaten wahi baaten wo na boli hui baaten

is tezi se lagti hain ki allah bachae

dikhti rahi phaili hui gardun ki siyahi

kitne hi sitare meri aankhon ne ginae

ta'rif bhi aisi hamein karni nahin aai

alfaz bhi aise muta'addid hi banae

yak-laKHt unDele gae hum hosh mein har bar

jate hue KHwabon ko kabhi dekh na pae

jaanoge to jaanam tumhein jaane nahin denge

behtar hai in auham ko jaane diya jae

aawaz se paiwasta ek andaz hai 'amir'

andaz ka andaza magar kaun lagae