bewafa ab na mohabbat ki duhai dunga

bevafā ab na mohabbat kī duhā.ī dūñgā

zindagī bhar maiñ tujhe zaḳhm-e-judā.ī dūñgā

jo mujhe jaisā samajhtā hai samajhne diije

apne baare meñ kahāñ tak maiñ safā.ī dūñgā

mere hisse meñ bhī aaya hai bulandī kā safar

āsmāñ vāloñ tumheñ maiñ bhī dikhā.ī dūñgā

baḳhsh degā vo mirī saarī ḳhatā.eñ fauran

us kī rahmat kī use itnī duhā.ī dūñgā

apne māñ-bāp ko kāñdhā bhī nahīñ de paayā

jo ye kahtā thā unheñ saarī kamā.ī dūñgā

maiñ safīrān-e-mohabbat kī sadā huuñ 'ālam'

mar bhī jā.ūñ to zamāne ko sunā.ī dūñgā

bewafa ab na mohabbat ki duhai dunga

zindagi bhar main tujhe zaKHm-e-judai dunga

jo mujhe jaisa samajhta hai samajhne dije

apne bare mein kahan tak main safai dunga

mere hisse mein bhi aaya hai bulandi ka safar

aasman walon tumhein main bhi dikhai dunga

baKHsh dega wo meri sari KHataen fauran

us ki rahmat ki use itni duhai dunga

apne man-bap ko kandha bhi nahin de paya

jo ye kahta tha unhen sari kamai dunga

main safiran-e-mohabbat ki sada hun 'alam'

mar bhi jaun to zamane ko sunai dunga