bewafa ke wade par eatibar karte hain

bevafā ke va.ade par e.atibār karte haiñ

vo na aa.egā phir bhī intizār karte haiñ

log ab mohabbat meñ kārobār karte haiñ

dil bachā ke rakhte haiñ jaañ shikār karte haiñ

ishrateñ jahāñ-bhar kī bas unhīñ kā hissa hai

jo ravish zamāne kī iḳhtiyār karte haiñ

shaḳhsiyat meñ jhāñkeñ to aur hī tamāsha hai

bāteñ jo nasīhat kī be-shumār karte haiñ

apne dam-qadam se to dasht bhī gulistāñ hai

ham jo ḳhārzāroñ ko lāla-zār karte haiñ

jaan se guzarte haiñ be-ḳhudī meñ ahl-e-dil

vo jo chashm-e-pur-fan ko zulfiqār karte haiñ

hoñ shagūfe shāḳhoñ ke yā laveñ charāġhoñ kī

sab havā ke dāman par inhisār karte haiñ

ham kahāñ ke daanā haiñ kis hunar meñ yaktā haiñ

log phir bhī jaane kyuuñ ham se pyaar karte haiñ

jis jagah pe ḳhadsha ho pair ke phisalne kā

ham qadam vahīñ 'ejāz' ustuvār karte haiñ

bewafa ke wade par eatibar karte hain

wo na aaega phir bhi intizar karte hain

log ab mohabbat mein karobar karte hain

dil bacha ke rakhte hain jaan shikar karte hain

ishraten jahan-bhar ki bas unhin ka hissa hai

jo rawish zamane ki iKHtiyar karte hain

shaKHsiyat mein jhanken to aur hi tamasha hai

baaten jo nasihat ki be-shumar karte hain

apne dam-qadam se to dasht bhi gulistan hai

hum jo KHarzaron ko lala-zar karte hain

jaan se guzarte hain be-KHudi mein ahl-e-dil

wo jo chashm-e-pur-fan ko zulfiqar karte hain

hon shagufe shaKHon ke ya lawen charaghon ki

sab hawa ke daman par inhisar karte hain

hum kahan ke dana hain kis hunar mein yakta hain

log phir bhi jaane kyun hum se pyar karte hain

jis jagah pe KHadsha ho pair ke phisalne ka

hum qadam wahin 'ejaz' ustuwar karte hain