bewafa tujhse kuchh gila hi nahin

bevafā tujh se kuchh gilā hī nahīñ

tū to goyā ki āshnā hī nahīñ

yā ḳhudā paas yā butāñ ke paas

dil kabhū apne haañ rahā hī nahīñ

dil se jo chāhiye so bāñdhiye baat

maiñ ne vallāh kuchh kahā hī nahīñ

tere kūcha se aah jaane ko

dil nahīñ yā ki apne pā hī nahīñ

yaañ taġhāful meñ apnā kaam huā

tere nazdīk ye jafā hī nahīñ

naame bulbul ne go hazār kiye

ek bhī gul ne par sunā hī nahīñ

kuchh na hotā 'asar' asar us ko

bhale ko naala tū kiyā hī nahīñ

bewafa tujh se kuchh gila hi nahin

tu to goya ki aashna hi nahin

ya KHuda pas ya butan ke pas

dil kabhu apne han raha hi nahin

dil se jo chahiye so bandhiye baat

main ne wallah kuchh kaha hi nahin

tere kucha se aah jaane ko

dil nahin ya ki apne pa hi nahin

yan taghaful mein apna kaam hua

tere nazdik ye jafa hi nahin

name bulbul ne go hazar kiye

ek bhi gul ne par suna hi nahin

kuchh na hota 'asar' asar us ko

bhale ko nala tu kiya hi nahin