bezar KHud na hote agar zindagi se hum

bezār ḳhud na hote agar zindagī se ham

ai zabt-e-ġham fareb na khāte kisī se ham

thā arsa-e-hayāt mohabbat meñ ham pe tang

karte rahe nibāh magar zindagī se ham

shāyad nigāh-e-lutf hamārī taraf bhī ho

yuuñ tak rahe haiñ aaj unheñ be-kasī se ham

le aa.ī be-ḳhudī ye hameñ kis maqām par

ma.alūm ho rahe haiñ jahāñ ajnabī se ham

jab tak na de najāt ġham-e-zindagī hameñ

laḌte raheñge kashmakash-e-zindagī se ham

ai bevafā vafā kā hamārī na de javāb

tujh ko samajh rahe haiñ tirī be-ruḳhī se ham

'hasrat' ko tū ne rāh-e-mohabbat meñ kho diyā

baaz aa.e ḳhizr-e-rāh tirī rahbarī se ham

bezar KHud na hote agar zindagi se hum

ai zabt-e-gham fareb na khate kisi se hum

tha arsa-e-hayat mohabbat mein hum pe tang

karte rahe nibah magar zindagi se hum

shayad nigah-e-lutf hamari taraf bhi ho

yun tak rahe hain aaj unhen be-kasi se hum

le aai be-KHudi ye hamein kis maqam par

malum ho rahe hain jahan ajnabi se hum

jab tak na de najat gham-e-zindagi hamein

laDte rahenge kashmakash-e-zindagi se hum

ai bewafa wafa ka hamari na de jawab

tujh ko samajh rahe hain teri be-ruKHi se hum

'hasrat' ko tu ne rah-e-mohabbat mein kho diya

baz aae KHizr-e-rah teri rahbari se hum