bhaDe ka ek makan hun mujhko KHabar nahin hai

bhāḌe kā ik makāñ huuñ mujh ko ḳhabar nahīñ hai

apnā hī mehmāñ huuñ mujh ko ḳhabar nahīñ hai

koī batā.e mujh ko zinda huuñ mar chukā huuñ

gar huuñ to maiñ kahāñ huuñ mujh ko ḳhabar nahīñ hai

kuchh bhī nahīñ bachā hai bas duur tak ḳhalā hai

kyā maiñ hī āsmāñ huuñ mujh ko ḳhabar nahīñ hai

tum mere darmiyāñ ho mujh ko pata hai lekin

maiñ kis ke darmiyāñ huuñ mujh ko ḳhabar nahīñ hai

kuchh sau arab sitāre mujh meñ haiñ dafn ya.anī

maiñ ek kahkashāñ huuñ mujh ko ḳhabar nahīñ hai

apne hī zehn-o-dil par chhāyā huā huuñ kab se

bādal huuñ yā dhuāñ huuñ mujh ko ḳhabar nahīñ hai

koī ḳhayāl huuñ maiñ yā phir savāl huuñ maiñ

maiñ kaun sā samāñ huuñ mujh ko ḳhabar nahīñ hai

kirdār mar chuke haiñ lekin maiñ jī rahā huuñ

maiñ kaisī dāstāñ huuñ mujh ko ḳhabar nahīñ hai

bhaDe ka ek makan hun mujh ko KHabar nahin hai

apna hi mehman hun mujh ko KHabar nahin hai

koi batae mujh ko zinda hun mar chuka hun

gar hun to main kahan hun mujh ko KHabar nahin hai

kuchh bhi nahin bacha hai bas dur tak KHala hai

kya main hi aasman hun mujh ko KHabar nahin hai

tum mere darmiyan ho mujh ko pata hai lekin

main kis ke darmiyan hun mujh ko KHabar nahin hai

kuchh sau arab sitare mujh mein hain dafn yani

main ek kahkashan hun mujh ko KHabar nahin hai

apne hi zehn-o-dil par chhaya hua hun kab se

baadal hun ya dhuan hun mujh ko KHabar nahin hai

koi KHayal hun main ya phir sawal hun main

main kaun sa saman hun mujh ko KHabar nahin hai

kirdar mar chuke hain lekin main ji raha hun

main kaisi dastan hun mujh ko KHabar nahin hai