bhai badal gaya kabhi beTa badal gaya

bhaa.ī badal gayā kabhī beTā badal gayā

aayā jo vaqt ḳhuun kā rishta badal gayā

har zulm-e-nā-ravā kā muḳhālif rahā thā jo

mansab milā to us kā bhī lahja badal gayā

vo sīdhe-sāde log vo chaupāl ab kahāñ

ek ek karke gaañv kā naqsha badal gayā

patthar vahī galī bhī vahī log bhī vahī

lekin sitam-shi.ār kā pesha badal gayā

dariyā-dilī pe apnī bahut naaz thā use

dekhī hamārī pyaas to rasta badal gayā

kaise hamāre gaañv kā hotā koī vikās

kursī badal ga.ī kabhī netā badal gayā

ab inqilāb-e-dahr kī bāteñ kahāñ 'niyāz'

jis fikr-o-fan pe naaz thā kab kā badal gayā

bhai badal gaya kabhi beTa badal gaya

aaya jo waqt KHun ka rishta badal gaya

har zulm-e-na-rawa ka muKHalif raha tha jo

mansab mila to us ka bhi lahja badal gaya

wo sidhe-sade log wo chaupal ab kahan

ek ek karke ganw ka naqsha badal gaya

patthar wahi gali bhi wahi log bhi wahi

lekin sitam-shiar ka pesha badal gaya

dariya-dili pe apni bahut naz tha use

dekhi hamari pyas to rasta badal gaya

kaise hamare ganw ka hota koi wikas

kursi badal gai kabhi neta badal gaya

ab inqilab-e-dahr ki baaten kahan 'niyaz'

jis fikr-o-fan pe naz tha kab ka badal gaya