bhale hi hast se nabud hota

bhale hī hast se nābūd hotā

ziyāñ merā kisī kā suud hotā

maiñ jis kī aarzū meñ mar rahā huuñ

tasavvur meñ to vo maujūd hotā

jamī hai maslahat kī barf varna

hamārā hausla bārūd hotā

havas kyūñkar tumheñ bechain kartī

sukūn-e-dil agar maqsūd hotā

jo ham karte na azm-e-haq-navā.ī

amīr-e-shahr kyoñ namrūd hotā

hasad kā tel hai tere diye meñ

ujālā to na hotā duud hotā

tilism ābād hai shahr-e-taḳhayyul

jise maiñ sochtā mash.hūd hotā

'ḳhalish' maslak hai āfāqī hamārā

kisī sarhad meñ kyoñ mahdūd hotā

bhale hi hast se nabud hota

ziyan mera kisi ka sud hota

main jis ki aarzu mein mar raha hun

tasawwur mein to wo maujud hota

jami hai maslahat ki barf warna

hamara hausla barud hota

hawas kyunkar tumhein bechain karti

sukun-e-dil agar maqsud hota

jo hum karte na azm-e-haq-nawai

amir-e-shahr kyon namrud hota

hasad ka tel hai tere diye mein

ujala to na hota dud hota

tilism aabaad hai shahr-e-taKHayyul

jise main sochta mashhud hota

'KHalish' maslak hai aafaqi hamara

kisi sarhad mein kyon mahdud hota