bhar to de maut zara umr ke paimane ko

bhar to de maut zarā umr ke paimāne ko

vaqt likkhegā lahū se mire afsāne ko

dushman-e-jāñ hī sahī rāhbar-e-manzil na sahī

raushnī maut dikhātī rahī parvāne ko

ġham ġhalat hote the maiḳhāne meñ kal kī hai ye baat

mauj-e-ġham aaj bahā le ga.ī maiḳhāne ko

dast-e-himmat kī hai tauhīn duā kyā kartā

aar samjhā kiyā taqdīr badalvāne ko

paañv se un ke nikalte hue dekhī hai zamīñ

haath se rakh bhī na paa.e the jo paimāne ko

rāh-e-tadbīr meñ haa.il ho to ka.aba Dhā deñ

aaj siine se lagā.e haiñ jo but-ḳhāne ko

koshish-e-zabt ne chehre kī badal dī rangat

kis ne rokā thā sitam kar ke taḌap jaane ko

ab ye qismat ki rahūñ zauq-e-amal se mahrūm

sar pe āñkhoñ pe rakhā aap ke farmāne ko

kuchh junūñ ne bhī tamāshā-e-ḳhabar dekh liyā

kitne dīvāne bane dekh ke dīvāne ko

bhar to de maut zara umr ke paimane ko

waqt likkhega lahu se mere afsane ko

dushman-e-jaan hi sahi rahbar-e-manzil na sahi

raushni maut dikhati rahi parwane ko

gham ghalat hote the maiKHane mein kal ki hai ye baat

mauj-e-gham aaj baha le gai maiKHane ko

dast-e-himmat ki hai tauhin dua kya karta

aar samjha kiya taqdir badalwane ko

panw se un ke nikalte hue dekhi hai zamin

hath se rakh bhi na pae the jo paimane ko

rah-e-tadbir mein hail ho to kaba Dha den

aaj sine se lagae hain jo but-KHane ko

koshish-e-zabt ne chehre ki badal di rangat

kis ne roka tha sitam kar ke taDap jaane ko

ab ye qismat ki rahun zauq-e-amal se mahrum

sar pe aankhon pe rakha aap ke farmane ko

kuchh junun ne bhi tamasha-e-KHabar dekh liya

kitne diwane bane dekh ke diwane ko