bhara hua teri yaadon ka jam kitna tha

bharā huā tirī yādoñ kā jaam kitnā thā

sahar ke vaqt taqāzā-e-shām kitnā thā

ruḳh-e-zavāl pe rañg-e-davām kitnā thā

ki ghaT ke bhī mirā māh-e-tamām kitnā thā

thā tere naaz ko kitnā mirī anā kā ḳhayāl

mirā ġhurūr bhī terā ġhulām kitnā thā

jo pau phaTī to har ik dāstāñ tamām huī

ajab ki un ke liye ehtimām kitnā thā

unhīñ ko yaad kiyā jab to kuchh na yaad aayā

vo log jin kā zamāne meñ naam kitnā thā

abhī shajar se judā.ī ke din na aa.e the

pakā huā thā vo phal phir bhī ḳhaam kitnā thā

vahāñ to koī na thā ek apne ġham ke sivā

mire makāñ pe magar izhdihām kitnā thā

bhara hua teri yaadon ka jam kitna tha

sahar ke waqt taqaza-e-sham kitna tha

ruKH-e-zawal pe rang-e-dawam kitna tha

ki ghaT ke bhi mera mah-e-tamam kitna tha

tha tere naz ko kitna meri ana ka KHayal

mera ghurur bhi tera ghulam kitna tha

jo pau phaTi to har ek dastan tamam hui

ajab ki un ke liye ehtimam kitna tha

unhin ko yaad kiya jab to kuchh na yaad aaya

wo log jin ka zamane mein nam kitna tha

abhi shajar se judai ke din na aae the

paka hua tha wo phal phir bhi KHam kitna tha

wahan to koi na tha ek apne gham ke siwa

mere makan pe magar izhdiham kitna tha