bhare jo zaKHm to daghon se kyun uljhen?

bhare jo zaḳhm to dāġhoñ se kyuuñ uljheñ?

ga.ī jo biit un bātoñ se kyuuñ uljheñ?

uThā kar taaq pe rakh deñ sabhī yādeñ

nahīñ jo tū tirī yādoñ se kyuuñ uljheñ?

ḳhudā maujūd hai jo har jagah to phir

aqīdat-kesh but-ḳhānoñ se kyuuñ uljheñ?

ye maanā thī baḌī kaalī shab-e-furqat

sahar jab ho ga.ī rātoñ se kyuuñ uljheñ?

havā.eñ jo guloñ se kheltī thiiñ kal

mire mahbūb kī zulfoñ se kyuuñ uljheñ?

isī kāran nahīñ royā tire aage

mire aañsū tirī palkoñ se kyuuñ uljheñ?

nadī ye soch kar chup-chāp bahtī hai

sadā.eñ us kī vīrānoñ se kyuuñ uljheñ?

unheñ kyā vāsta 'ālok'-jī ġham se

guloñ ke āshnā ḳhāroñ se kyuuñ uljheñ?

bhare jo zaKHm to daghon se kyun uljhen?

gai jo bit un baaton se kyun uljhen?

uTha kar taq pe rakh den sabhi yaaden

nahin jo tu teri yaadon se kyun uljhen?

KHuda maujud hai jo har jagah to phir

aqidat-kesh but-KHanon se kyun uljhen?

ye mana thi baDi kali shab-e-furqat

sahar jab ho gai raaton se kyun uljhen?

hawaen jo gulon se khelti thin kal

mere mahbub ki zulfon se kyun uljhen?

isi karan nahin roya tere aage

mere aansu teri palkon se kyun uljhen?

nadi ye soch kar chup-chap bahti hai

sadaen us ki viranon se kyun uljhen?

unhen kya wasta 'alok'-ji gham se

gulon ke aashna KHaron se kyun uljhen?