bharen na waqt ke hathon jarahaten teri

bhareñ na vaqt ke hāthoñ jarāhateñ terī

rakheñ sambhāl ke dil ne amānateñ terī

chhupā ke tujh se kahāñ apne roz-o-shab le jā.ūñ

jahān-e-nūr tirā aur zulmateñ terī

bichhaḌ ke tujh se milā umr-bhar kā sannāTā

banā ga.iiñ mujhe tanhā rifāqateñ terī

tū hai vo fātah-e-ālam ki ek duniyā ne

shikast khā ke sarāhī hī himmateñ terī

tire nuqūsh-e-qadam se bahār thī in kī

haiñ muntazir mire dil kī masāfateñ terī

kahāñ hai shām-e-tamannā malāhatoñ kā vo rañg

kahāñ haiñ sub.h-e-tasavvur sabāhateñ terī

dil-e-hazīñ tirī chaukhaT pe umr kaun gañvā.e

kabhī samajh meñ na aa.iiñ zarūrateñ terī

azal se shīsha-e-gardūñ meñ ret chaltī hai

kabhī shumār meñ aa.iiñ na sā.ateñ terī

tū merī shirkat-e-hastī kahīñ qubūl to kar

tamām rañj mire sab masarrateñ terī

bharen na waqt ke hathon jarahaten teri

rakhen sambhaal ke dil ne amanaten teri

chhupa ke tujh se kahan apne roz-o-shab le jaun

jahan-e-nur tera aur zulmaten teri

bichhaD ke tujh se mila umr-bhar ka sannaTa

bana gain mujhe tanha rifaqaten teri

tu hai wo fatah-e-alam ki ek duniya ne

shikast kha ke sarahi hi himmaten teri

tere nuqush-e-qadam se bahaar thi in ki

hain muntazir mere dil ki masafaten teri

kahan hai sham-e-tamanna malahaton ka wo rang

kahan hain subh-e-tasawwur sabahaten teri

dil-e-hazin teri chaukhaT pe umr kaun ganwae

kabhi samajh mein na aain zaruraten teri

azal se shisha-e-gardun mein ret chalti hai

kabhi shumar mein aain na saaten teri

tu meri shirkat-e-hasti kahin qubul to kar

tamam ranj mere sab masarraten teri