bhaTak raha hun ki gir kar sambhal raha hun main

bhaTak rahā huuñ ki gir kar sambhal rahā huuñ maiñ

kisī tarah se to raste pe chal rahā huuñ maiñ

navāzishāt kī had se nikal rahā huuñ maiñ

haTā le haath ki karvaT badal rahā huuñ maiñ

junūñ meñ aql kī saudāgarī bhī kī maiñ ne

nigāh-e-nāz se duniyā badal rahā huuñ maiñ

havā-e-ġham se ghirā hai charāġh hastī kā

sambhālnā ki tire paas jal rahā huuñ maiñ

kisī bhī sāñche meñ qismat na Dhal sakī ab tak

hazār soz-e-tapish se pighal rahā huuñ maiñ

vo aa chale vo abhī aa.e dekh lo 'rāzī'

zarā sī der hai ruk jaao chal rahā huuñ maiñ

bhaTak raha hun ki gir kar sambhal raha hun main

kisi tarah se to raste pe chal raha hun main

nawazishat ki had se nikal raha hun main

haTa le hath ki karwaT badal raha hun main

junun mein aql ki saudagari bhi ki main ne

nigah-e-naz se duniya badal raha hun main

hawa-e-gham se ghira hai charagh hasti ka

sambhaalna ki tere pas jal raha hun main

kisi bhi sanche mein qismat na Dhal saki ab tak

hazar soz-e-tapish se pighal raha hun main

wo aa chale wo abhi aae dekh lo 'raazi'

zara si der hai ruk jao chal raha hun main