bhaTak rahe hain bhaTakte rahenge farzane

bhaTak rahe haiñ bhaTakte raheñge farzāne

qarīb aa ga.e manzil ke tere dīvāne

bahut qarīb the jalve unheñ na pahchāne

kahāñ gayā thā shu.ūr-e-nazar ḳhudā jaane

zabāñ pe harf-e-tamannā na aa.e kyā parvā

simaT ke aa ga.e nazroñ meñ dil ke vīrāne

huzūr-e-husn jo aa.e haiñ bahr-e-arz murād

unheñ sunāo mirī ḳhāmushī ke afsāne

guzar ga.ī mirī rūdād-e-ġham meñ raat tamām

phir us ke ba.ad na sham.eñ jalīñ na parvāne

talāsh-e-kūcha-e-jānāñ are ma.āz-allāh

ḳhud apnī gard meñ kho.e hue haiñ dīvāne

'nasīr' un kī samajh meñ bhī kuchh nahīñ aayā

jo aa rahe haiñ mujhe rāz-e-ishq samjhāne

bhaTak rahe hain bhaTakte rahenge farzane

qarib aa gae manzil ke tere diwane

bahut qarib the jalwe unhen na pahchane

kahan gaya tha shuur-e-nazar KHuda jaane

zaban pe harf-e-tamanna na aae kya parwa

simaT ke aa gae nazron mein dil ke virane

huzur-e-husn jo aae hain bahr-e-arz murad

unhen sunao meri KHamushi ke afsane

guzar gai meri rudad-e-gham mein raat tamam

phir us ke baad na shamen jalin na parwane

talash-e-kucha-e-jaanan are maaz-allah

KHud apni gard mein khoe hue hain diwane

'nasir' un ki samajh mein bhi kuchh nahin aaya

jo aa rahe hain mujhe raaz-e-ishq samjhane